Charlie Kirk u qëllua dje me armë gjatë një aktiviteti në Utah Valley University.
Ai ishte 31 vjeç, themelues i organizatës konservatore Turning Point USA dhe një nga zërat më të fortë të së djathtës amerikane. Ai ndërroi jetë pak minuta më parë, pasi u qëllua me armë gjatë një aktiviteti në Utah Valley University. Vdekja e tij u konfirmua publikisht nga presidenti Donald Trump.
Sipas autoriteteve dhe dëshmive nga vendngjarja, ngjarja ndodhi rreth orës 12:10 me orën lokale, kur Kirk po zhvillonte aktivitetin e tij “American Comeback Tour”. Nën një tendë me sloganin “Prove Me Wrong”, një plumb i vetëm u qëllua nga një ndërtesë rreth 200 metra larg, duke e goditur në pjesën e qafës.
Kirk u transportua menjëherë në spital, por pavarësisht përpjekjeve mjekësore, nuk mbijetoi. Ai la pas bashkëshorten dhe dy fëmijë të vegjël.
Donald Trump e quajti Kirk-un “një njeri të madh dhe legjendar”, duke shprehur ngushëllime për familjen e tij.
Figura të shumta politike, nga republikanë deri te demokratë, kanë shprehur keqardhje dhe tronditje, ndërsa FBI dhe ATF po udhëheqin hetimet. Deri tani, asnjë person nuk është arrestuar, edhe pse më herët u raportua gabimisht për një të ndaluar.
Në vitin 2012, vetëm 18 vjeç, Kirk themeloi Turning Point USA, organizatë që shpejt u shndërrua në një nga lëvizjet më të fuqishme në mobilizimin e të rinjve konservatorë. Ai ishte një bashkëpunëtor i ngushtë i Trump, një folës i rregullt në media konservatore, dhe kishte një ndikim të madh në rrjetet sociale përmes podcast-it dhe aktiviteteve të tij publike.
Vdekja e tij ka shkaktuar një valë të fortë reagimesh dhe ka rindezur debatin mbi dhunën politike në SHBA. Për shumë të rinj konservatorë, Kirk shihej si një figurë frymëzuese dhe një lider energjik.
