Gjykata e Lartë në Beograd i ka caktuar një muaj paraburgim shtetasit të Kosovës, Lulzim Halili, transmeton Anadolu.
Halili, i cili u arrestua në territorin e Serbisë më 22 korrik, është i dyshuar për krime lufte nga autoritetet serbe.
Megjithëse shteti serb pretendon se Halili ka qenë pjesë e Ushtrisë Çlirimtare të Kosovës (UÇK), një gjë të tillë e ka hedhur poshtë Organizata e Vetërave të UÇK-së nëpërmjet një reagimi ku deklaruan se emri i tij nuk figuron tek listat e veteranëve, as tek brigadat e UÇK-së.
Prokuroria për Krime Lufte në Beograd bëri të ditur se më 24 korrik ka nxjerrë urdhër për fillimin e hetimeve ndaj shtetasit kosovar për shkak “të dyshimeve për kryerjen e veprës penale të organizimit dhe nxitjes për kryerjen e gjenocidit dhe krimeve të luftës”.
Për arrestimin e tij ka reaguar Ministria e Punëve të Jashtme dhe Diasporës e Kosovës, e cila tha se Serbia nuk po i jep informacione ministrisë lidhur me arrestimin e shtetasit kosovar.
Ministria kosovare më 23 korrik tha se e ka informuar delegacionin e Bashkimit Evropian (BE) dhe të shteteve të QUINT-it në Serbi lidhur me këtë rast.
“Sapo të konfirmohet nëse z. Halili do t’i nënshtrohet masës së paraburgimit dhe do të iniciohet procedurë penale ndaj tij, Zyra Ndërlidhëse do të parashtrojë kërkesë zyrtare për vizitë në Qendrën e Mbajtjes”, tha ministria.
Mediat në Serbi kanë raportuar se Halili dyshohet për krime lufte kundër njerëzimit.
Ministria u ka bërë thirrje të gjithë qytetarëve të Kosovës që të shmangin udhëtimet dhe kalimet tranzit përmes territorit të Serbisë për shkak të rrezikut të shtuar për ndalime dhe arrestime nga autoritetet serbe.
Arrestimi i shtetasit Kosovar erdhi vetëm pak ditë pas arrestimit dhe paraburgimit të ndihmës-drejtorit të Zyrës për Kosovën në Qeverinë e Serbisë, Igor Popoviq, nga autoritetet kosovare.
