Ushtruesi i detyrës së ministrit të Drejtësisë, Blerim Sallahu ka reaguar lidhur me çështjen e Gjykatës Speciale dhe gjykimin ndaj ish-krerëve të UÇK-së.
Sallahu në një reagim në Facebook ka shkruar se Qeveria e Kosovës, konkretisht Ministria e Drejtësisë, në vazhdimësi ka mbështetur financiarisht mbrojtjen e krerëve të UÇK-së në Gjykatën e Hagës.
“Ministria e Drejtësisë, gjatë pesë viteve të fundit, ka shpenzuar rreth 35 milionë euro për pagesën e avokatëve dhe shpenzimeve të tjera, me qëllim që të akuzuarit të lirohen nga aktakuzat inekzistente”, ka shkruar Sallahu.
Ushtruesi i detyrës së ministrit të Drejtësisë ka theksuar se vetëm për mbrojtjen e ish-presidentit Hashim Thaçi, brenda një periudhe pesëvjeçare, shteti ka paguar rreth 6 milionë euro mbrojtje ligjore.
“Ne, si qeveri, jemi duke mbuluar aspektin financiar, ndërsa të akuzuarit po vuajnë mungesën e lirisë si pasojë e mbështetjes, themelimit dhe gjykimit të padrejtë nga një gjykatë që gjykon etnikisht dhe padrejtësisht”, është shprehur Sallahu.
