Të dhënat mbi numrin dhe gjendjen e kosovarëve i ka bërë të ditura Ministria e Punëve të Jashtme dhe Diasporës të Kosovës përmes informacioneve që ka grumbulluar nga misionet diplomatike.
Ministria ka bërë të ditur se është në komunikim të vazhdueshëm me qytetarët e Republikës së Kosovës që ndodhen në Lindje të Mesme, me qëllim të përcjelljes së gjendjes së tyre dhe ofrimit të mbështetjes së nevojshme.
Sipas të dhënave më të fundit:
Në Izrael ndodhen 21 qytetarë të Republikës së Kosovës; në Arabinë Saudite 331 qytetarë; në Emiratet e Bashkuara Arabe rreth 400 qytetarë rezident dhe 70 turistë të lajmëruar deri më sot më datë 02.03.2026; në Katar 75 qytetarë; në Kuvajt përafërsisht 60 qytetarë; në Bahrein 4 qytetarë; dhe në Oman 2 qytetarë.
“Sipas informacioneve nga misionet tona diplomatike, të gjithë qytetarët tanë aktualisht janë në gjendje të mirë shëndetësore”- njofton Ministria.
Ministria ka bërë të ditur se është duke punuar në mënyrë të vazhdueshme dhe të koordinuar me autoritetet e shteteve përkatëse për të identifikuar dhe siguruar opsionet më të përshtatshme për evakuimin e qytetarëve tanë, nëse kjo paraqitet si e nevojshme.
Megjithatë, sipas MPJD-së, institucionet vendore të të gjitha shteteve të rajonit, rekomandojnë dhe udhëzojnë që në këtë fazë të mos ndërmerren udhëtime, deri në qetësimin e plotë të situatës së sigurisë.
