Prokuroria Themelore në Prishtinë është deklaruar lidhur me dy vrasjet e rënda që kanë ndodhur të mërkurën mbrëma në kryeqytet.
Në një përgjigje për Telegrafin, nga prokuroria kanë thënë se lidhur me rastin i cili ka ndodhur në rrugën “Dalip Alshiqi”, nga informatat e deritanishme dyshohet për grabitje me pasojë vdekjen.
“Nga nata kritike e në vazhdim, Prokurori i Shtetit në koordinim me njësitë relevante janë të angazhuar në ndriçimin e të gjitha rrethanave të këtij rasti. Me urdhër të prokurorit trupi i viktimës është dërguar për obduksion, në Institutin e Mjekësisë Ligjore”, ka deklaruar ky institucion.
Ndërsa, për rastin i cili ka ndodhur në rrugën “Ali Vitia”, dyshohet se një person ka privuar nga jeta viktimën (mashkull), me mjet të mprehtë-thikë.
“Viktima është dërguar në IML, me urdhër të prokurorit, ndërkaq rasti është iniciuar ‘Vrasje’. Veprimet hetimore po vazhdojnë të ndërmerren karshi këtij rasti dhe personi i dyshuar është identifikuar, mirëpo aktualisht ndodhet në arrati”, bëhet e ditur më tej. /Telegrafi/
