Kreu i Partisë Demokratike, Sali Berisha tha se partia e drejtuar prej tij po negocion edhe me kreun e grupit parlamentar të PD-së, Enkelejd Alibeajn për të dalë me kandidat të përbashkët në zgjedhjet lokale.
Në komunikim me gazetarët, kryedemokrati theksoi se të gjithë mund të kandidojnë për bashkitë e vendit me përjashtim të njërit, duke nënkuptuar ish-kreun e PD-së, Lulzim Basha.
“U kërkova partive aleate, bëni listat, të votojnë anëtarët dhe simpatizantët tuaj. Po ecën drejt mirëkuptimit. Nëse nuk bashkohen? Nuk shoh arsye se përse ata të mos bashkohen në proces. Të gjithë mund të marrin pjesë veç njërit”, u shpreh Berisha.
“E merrni me mend. Është vetëm, është i izoluar. Të trajtojë problemin serioz. Janë bërë edhe takime. Zoti Paloka po merret intensivisht me këtë. Janë të hapura të gjitha dyert e komunikimit. Ftesa ime publike është rasti i fundit. Nëse duan përmes një marrëveshje, ne presim çdo sugjerim”, tha Berisha. /Telegrafi/
