Anëtarët e Parlamentit Evropian miratuan një rezolutë që i bën thirrje botës të rrisë ndihmën ushtarake për Ukrainën në mes të agresionit ushtarak rus.
Sipas shërbimit për shtyp të Parlamentit Evropian, rezoluta u miratua me 504 vota pro, 26 kundër dhe 36 abstenime.
Duke përshëndetur guximin e popullit ukrainas që mbrojnë vendin e tyre dhe vlerat evropiane, eurodeputetët u kanë bërë thirrje vendeve anëtare të BE-së dhe vendeve të tjera që mbështesin Ukrainën që të rrisin masivisht ndihmën e tyre ushtarake, veçanërisht në zonat e kërkuara nga qeveria ukrainase.
Kështu, sipas mediave të huaja, përcjell Telegrafi, eurodeputetët u kërkojnë shteteve anëtare “ngurruese” që të ofrojnë pjesën e tyre të ndihmës së nevojshme ushtarake, e cila do të ndihmojë në “shkurtimin” e luftës.
