Presidenti i Emirateve të Bashkuara Arabe, Sheikh Mohammed bin Zayed Al Nahyan gjendet Tiranë për një vizitë zyrtare me ftesë të Kryeministrit të Shqipërisë, Edi Rama.
Vizita shënon një moment historik në marrëdhëniet ndërmjet dy vendeve, duke thelluar partneritetin strategjik në fusha kyçe si ekonomia, energjia, siguria ushqimore, teknologjia dhe zhvillimi i qëndrueshëm.
Presidenti bin Zayed u prit në Aeroportin Ndërkombëtar të Tiranës nga Kryeministri Rama dhe anëtarë të kabinetit qeveritar. Më pas, në ambientet e Kryeministrisë, u zhvillua takimi dypalësh, ku të dy liderët nënvizuan rëndësinë e thellimit të bashkëpunimit ekonomik dhe diplomatik.
“Sheikh Mohammed bin Zayed është një mik i madh i Shqipërisë dhe një udhëheqës që ka ndërtuar ura bashkëpunimi në të gjithë rajonin tonë”, u shpreh Kryeministri Rama gjatë konferencës për shtyp.
Presidenti i Emirateve të Bashkuara Arabe u dekorua me Urdhrin e Madh me Yll të Mirënjohjes Publike, një vlerësim i lartë shtetëror për përkushtimin e tij të palëkundur ndaj marrëdhënies strategjike mes dy vendeve.
Në përfundim të takimit, palët u shprehën të gatshme për të nisur projekte të reja që do të krijojnë mundësi të reja për zhvillim ekonomik dhe bashkëpunim afatgjatë.
Vizita e Presidentit bin Zayed në Shqipëri vjen si pjesë e një turi diplomatik rajonal dhe konfirmon interesin e Emirateve për të qenë një partner aktiv në zhvillimin dhe stabilitetin e Evropës Juglindore.
