Real Madridi ka marrë tashmë një vendim strategjik për të ardhmen e dy talenteve të rinj në repartin ofensivë, Endrick dhe Gonzalo.
Sipas raportimeve nga mediume të ndryshme në Spanjë, Endrick do të qëndrojë në ekipin e parë dhe do të ketë mundësinë të tregojë veten si qendërsulmues, ndërsa Gonzalo Garcia pritet të dërgohet në huazim për të fituar përvojë dhe minuta loje.
Zyrtarët e klubit madrilen kanë ndërtuar një plan fleksibël, i cili parashikon që nëse Endrick nuk jep pritshmëritë deri në fund të vitit, Gonzalo Garcia mund të rikthehet nga huazimi në janar dhe të marrë rolin kryesor në sulm.
Për Gonzalo Garcia tashmë ka interes nga disa skuadra, me Getafen që kryeson listën e klubeve spanjolle të interesuara, ndërsa edhe disa klube angleze si Sunderland kanë ndjekur nga afër situatën e tij.
Megjithatë, interesimi i Sunderlandit është zbehur pas huazimit të Marc Guiu nga Chelsea, duke ia hapur rrugën opsioneve të tjera si Leeds United dhe Valencia, që po kërkojnë përforcime për sulmin.
Real Madridi po analizon me kujdes të gjitha propozimet për huazimin e Gonzalos, me synimin që ta dërgojë te një klub ku do të zhvillohet në mënyrë optimale dhe të rikthehet më i përgatitur.
Me këtë qasje, klubi po ndërton një të ardhme të fortë për repartin ofensivë, duke i dhënë Endrick një shans real për të treguar veten, ndërsa njëkohësisht investon në rritjen e Gonzalos si një alternativë serioze për të ardhmen. /Telegrafi/
