Partia Demokratike e Kosovës (PDK) duket se po përballet me një tjetër fazë të thellë përçarjeje, e ngjashme me atë të vitit 2014, kur Fatmir Limaj dhe Jakup Krasniqi u ndanë nga Hashim Thaçi e Kadri Veseli për të themeluar një parti të re.
Dorëheqja e Memli Krasniqit nga pozita e kryetarit të PDK-së ka hapur një cikël të ri pakënaqësish dhe tensione të brendshme. Konventa e jashtëzakonshme për zgjedhjen e kryetarit të ri është caktuar të mbahet më 17 nëntor, por që në momentet e para pas dorëheqjes, debatet e ashpra, dilemat dhe pozicionimet e ndryshme kanë filluar të dalin në sipërfaqe.
Enver Hoxhaj, ish-kryetar i PDK-së dhe një figurë me role kyçe në qeverisjet e Hashim Thaçit, kërkoi shtyrjen e konventës, duke ngritur dyshime për procesin dhe kohezionin e brendshëm të partisë.
Ndërkohë, sekretarja e përgjithshme Vlora Çitaku reagoi duke theksuar se PDK ka nevojë për një drejtim të ri dhe për vizion të ri, jo për rikthimin e skemave të vjetra. Ajo theksoi:
“PDK-ja ka nevojë për drejtim të ri, jo për skema të vjetra; ka nevojë për vizion të ri, jo për ndërrim rolesh. Ky është momenti për t’i hapur rrugën ndryshimit të vërtetë.”
Pas Hoxhajt reagoi edhe kryetari i komunës së Drenasit, Ramiz Lladrovci, i cili shpesh ka pasur përplasje me kryesinë e PDK-së. Ai kërkoi që kandidati i ri për kryetar të prezantojë platformë të qartë politike dhe një ekip të aftë për të sfiduar qeverinë aktuale.
Këto zhvillime kanë rikthyer kujtimet e vitit 2014, kur PDK u përball me një përçarje të thellë të shkaktuar nga mosmarrëveshje të brendshme, publikimi i përgjimeve dhe pakënaqësitë ndaj modelit të udhëheqjes së asaj kohe.
Fatmir Limaj dhe Jakup Krasniqi u larguan nga PDK për shkak të mosmarrëveshjeve të thella ideologjike dhe organizative — nga mungesa e demokracisë së brendshme e deri te skandalet që kishin goditur partinë. Kulmi i tensioneve u arrit në fillim të vitit 2014, ndërsa më 28 shkurt Limaj dhe Krasniqi themeluan partinë e re Nisma për Kosovën, duke e vulosur ndarjen.
Sot, pas më shumë se një dekade, dhe në një moment kyç për të ardhmen e saj, PDK rrezikon të përballet sërish me dinamika të ngjashme fragmentimi. Pyetja që shtrohet është: A do të arrijë partia të dalë e bashkuar nga kjo krizë, apo historia e vitit 2014 do të përsëritet?
