Shkatërrimi i rajonit të Karabakut gjatë okupimit të Armenisë duhet të sillet para Gjykatës Ndërkombëtare të Drejtësisë, tha sot presidenti turk Recep Tayyip Erdoğan, raporton Anadolu Agency (AA).
“Tani shikoj djathtas dhe majtas. Çfarë i bënë Jabrayil-it gjatë periudhës së okupimit? E pyeta Alijevin, a ka ardhur OSBE-ja apo BE-ja në këtë vend? Ai tha: ‘Jo. nuk erdhën’. Pse nuk erdhën, sepse do të shohin turpin e tyre, do të shohin se çfarë i bëri Perëndimi këtu Jabrayil-it dhe gjithë Karabakut duke i dhënë mbështetje gjatë procesit të pushtimit”, tha Erdoğan.
“Është e nevojshme të kërkohet kompensim duke i sjellë ata në Gjykatën Ndërkombëtare të Drejtësisë. Është e nevojshme t’i fusim në qoshe duke kërkuar kompensim”, tha Erdoğan në një konferencë shtypi me homologun e tij azerbajxhanas Ilham Aliyev në rrethin Jabrayil.
Konferenca për shtyp u organizua pasi dy liderët inauguruan së bashku Aeroportin Ndërkombëtar Zangilan, aeroportin e dytë të Azerbajxhanit në territoret e rifituara nga Armenia gjatë Luftës së Karabakut të vitit 2020.
Erdoğan tha se Turqia është e gatshme të qëndrojë pranë Azerbajxhanit në të gjithë sektorët, veçanërisht në bujqësi, energji të gjelbër dhe qytete të zgjuara, si pjesë e Planit të Veprimit të Karabakut.
Marrëdhëniet midis ish-republikave sovjetike, Azerbajxhanit dhe Armenisë, kanë qenë të tensionuara që nga viti 1991, kur ushtria armene pushtoi Nagorno-Karabakun, territor i njohur ndërkombëtarisht si pjesë e Azerbajxhanit.
Baku çliroi disa qytete, fshatra dhe vendbanime nga pushtimi armen gjatë përleshjeve 44-ditore në vjeshtën e vitit 2020, të cilat përfunduan pas një armëpushimi të ndërmjetësuar nga Moska. Marrëveshja e paqes festohet si triumf në Azerbajxhan. /aa
