Kryeministri Albin Kurti do të raportojë para deputetëve në Kuvend lidhur me dialogun Kosovë-Serbi dhe dakordimin për planin evropian, në një seancë që do të nisë këtë të enjte në orën 13:00.
Kështu u vendos pasi deputetët votuan pro mocionit të Lidhjes Demokratike të Kosovës për raportimin e kryeministrit lidhur me këtë çështje, pas takimit të 27 shkurtit në Bruksel, transmeton Telegrafi.
Pro mocionit votuan edhe deputetët e mazhorancës, pasi morën konfirmim nga kryeministri se mund të raportojë nga ora 13:00 deri në orën 16:00.
“Ashtu siç deklaruam që në fillim, kryeministri është i gatshëm të jetë në seancë, të debatojë me deputetët. Disponueshmëria e tij kohore është nga ora 13:00 deri në 16:00, kur mund të debatojmë bashkërisht rreth kësaj çështje”, ka thënë shefja e Grupit Parlamentar të Lëvizjes Vetëvendosje, Mimoza Kusari-Lila./Telegrafi/
