Policia e Kosovës, përmes hetuesve të Drejtorisë për Hetimin e Krimit të Organizuar dhe Krimeve të Rënda, pas veprimeve hetimore me urdhër të Prokurorisë Speciale, ka arrestuar dy persona, B.M. dhe Q.M., nën dyshimet për kryerjen e veprave penale “fajde”, “shpërlarje e parave”, “kanosje”, “falsifikim i dokumenteve” dhe “mashtrim”.
Sipas njoftimit zyrtar, më 5 shtator 2025, hetuesit kanë zbatuar urdhër kontrollin e lëshuar nga Gjykata Themelore në Prishtinë në katër lokacione të personave të dyshuar – shtëpi, banesa, biznese dhe objekte përcjellëse.
Gjatë këtij kontrolli janë gjetur dhe sekuestruar dëshmi materiale, të cilat do të përdoren në procedurën penale ndaj të dyshuarve.
Pas intervistimit, me vendim të prokurorit nga Prokuroria Speciale, dy të dyshuarit janë ndaluar për 48 orë.
