Këtë vit fermerët shqiptar nuk po e shesin dot grurin as me gjysmën e çmimit të vitit të shkuar.
Nga 55 lekë për kilogramë, sot çmimi i grurit nuk e kalon vlerën 26 lekë për kilogramë. Ky çmim për përpunuesit e grurit është i pranueshëm pasi tregjet ndërkombëtare kanë sasi të bollshme të grurit dhe konkurrueshmëria është e lartë.
“Direkt pas korrjes ka një ngërç në gjithë tregun e grurit botëror. Deri në shtator oferta është më e madhe se kërkesa se sasia e grurit që prodhohet në të gjithë botën nuk arrin të magazinohet. Merret në Itali, Francë, Ukrainë, Rusi, Serbia pak. Sot po shkarkohet në Durrës. Gruri nga Europa dhe këto zona vjen me 260 dollarë toni”, deklaroi kreu i Unionit të Prodhuesve të Miellit, Adi Haxhiymeri për A2 CNN.
Çmimet e viti të kaluar vështirë se kthehen. Prodhuesit botërorë dhe evropianë rritën sipërfaqet e mbjelljes së grurit për shkak të rrezikut nga konflikti mes Rusisë dhe Ukrainës.
“Jemi mësuar keq me çmimin e viti të kaluar vjet. Çmimi vjet ishte i lartë si pasojë e krizës dhe prishjes së zinxhirit të furnizimit. Këtë vit jemi në situatë tjetër. SHBA, Kanada, Indi, Kinë e kanë rritur prodhimin e grurit për të ekuilibruar mungesën që shkaktoi viti i kaluar. Rritja e prodhimit dhe riorganizimi i tregjeve ka bërë që tregu të funksionojë normalisht dhe çmimi të shkojë aty ku duhet të jetë edhe këtë vit çmimi është më i lartë se në vitin 32021 para krizës”, shprehet eksperti i bujqësisë Shkëlzen Marku.
