Një gjykatë në Izrael ka refuzuar kërkesën e kryeministrit Benjamin Netanyahu për të shtyrë dëshminë e tij në gjyqin për korrupsion, pavarësisht mbështetjes së shprehur publikisht nga presidenti amerikan, Donald Trump, shkruan Gazeta Sinjali.
Avokati i Netanyahut kërkoi të enjten që kryeministri të mos paraqitej për dëshmi për dy javë, duke pretenduar se ai duhet të fokusohet në “çështje të sigurisë” pas përfundimit të konfliktit 12-ditor mes Izraelit dhe Iranit.
Por Gjykata e Qarkut në Jerusalem, në vendimin e saj të publikuar online, deklaroi se: “Forma aktuale e kërkesës së Netanyahut nuk ofron bazë apo justifikim të detajuar për anulimin e seancave dëgjimore.”
Ndërkohë, Donald Trump reagoi duke e cilësuar gjyqin si të padrejtë.
“Ky është një proces i turpshëm. Është një gjueti shtrigash dhe duhet të anulohet menjëherë ose të falet ky hero i madh.”
Netanyahu po përballet me akuza për ryshfet, mashtrim dhe shpërdorim detyre në disa raste që lidhen me përfitime personale dhe marrëdhënie të dyshimta me mediat.
Ai i ka mohuar të gjitha akuzat.
