Njësiti i Task Forcës DRK–Lindje i Policisë së Kosovës ka hasur në një automjet të dyshuar për kontrabandë në zonën e Kaçanikut, gjatë patrullimit të rregullt operativ.
Sipas njoftimit të Policisë, bëhet fjalë për një kombi pa targa i cili nuk iu bind urdhrave për ndalim dhe gjatë ndjekjes drejtuesi i dyshuar ka goditur qëllimisht veturën zyrtare të Policisë së Kosovës.
Si pasojë e përplasjes, tre zyrtarë policorë kanë pësuar lëndime trupore, për të cilat kanë pranuar trajtim mjekësor.
I dyshuari ka braktisur automjetin dhe është arratisur në drejtim të panjohur në territorin e Republikës së Maqedonisë së Veriut, ndërkohë që automjeti i mbushur me mall të kontrabanduar është konfiskuar dhe do t’i dorëzohet Doganës së Republikës së Kosovës.
Policia bën të ditur se rasti është duke u hetuar nga njësitë relevante.
