Ministri i Mbrojtjes, Ejup Maqedonci, sot u prit në një takim nga zëvendëskryeministri dhe ministri i Mbrojtjes së Katarit, Khalid bin Mohammad Al Attiyah, të cilin e falënderoi për mbështetjen nga shteti i Katarit, si edhe për angazhimin e tij personal për thellimin e marrëdhënieve nga pozicioni paraprak i ministrit për Punë të Jashtme të Katarit.
Po ashtu, ministri e njoftoi homologun e tij, Al Attiyah, për situatën e sigurisë në regjionin e Evropës, e veçanërisht atë në Ballkanin Perëndimor, si edhe për zhvillimin e kapaciteteve mbrojtëse të Republikës së Kosovës.
Në takim diskutuan për vendosjen e urave të bashkëpunimit në fushën e mbrojtjes midis dy vendeve dhe u dakorduan për bashkëpunim në fushën e trajnimeve dhe edukimit ushtarak, si dhe mundësisë për investime të përbashkëta në fushën e prodhimit ushtarak.
Nga ana e tij, ministri Al Attiyah ofroi 6 kuota për edukim të kadetëve tanë në akademitë ushtarake të Katarit, duke përfshirë dhe Akademinë e Forcave Ajrore të Katarit.
