KE ka kërkuar nga palët që të krijojnë kushte për zgjedhje të parakohshme në Zubin Potok, Zveçan, Leposaviq dhe Mitrovicë e veriut, ndërsa ka paralajmëruar pasoja negative nëse nuk ndodhë kjo.
“Këshilli Evropian dënon incidentet e fundit të dhunshme në veri të Kosovës dhe bën thirrje për një deeskalim të menjëhershëm të situatës, bazuar në elementet kyçe të përshkruara tashmë nga Bashkimi Evropian më 3 qershor 2023. Palët duhet të krijojnë kushtet për zgjedhje të parakohshme në të katër komunat në veri të Kosovës. Dështimi për të de-përshkallëzuar tensionet do të ketë pasoja negative”, thuhet në njoftimin e lëshuar nga Këshilli i Bashkimit Evropian.
Tutje, Këshilli i Bashkimit Evropian thekson se është thelbësore që dialogu të vazhdojë.
“Është thelbësore që dialogu i ndërmjetësuar nga BE-ja i udhëhequr nga Përfaqësuesja e Lartë dhe zbatimi i shpejtë i Marrëveshjes në rrugën drejt normalizimit dhe Aneksit të Zbatimit të saj të vazhdojë. Kjo përfshin themelimin e Asociacionit/Bashkësisë së Komunave me Shumicë Serbe”, vijon njoftimi.
Tensione në veri ka pasur që nga data 26 maj, kur kryetarët e rinj shqiptarë kanë marrë detyrën e tyre. Serbët lokalë kanë kundërshtuar vendosjen e tyre në objektet komunale, ku kanë tentuar të hyjnë dhunshëm brenda tyre.
Nga protestat e dhunshme, janë lënduar ushtarë të KFOR-it, Policia e Kosovës dhe ekipet e mediave. Po ashtu janë dëmtuar vetura zyrtare dhe të mediave.
Policia ka arrestuar disa të dyshuar lidhur me sulmet, ndërsa KFOR dhe Policia vazhdon me praninë e tyre pranë objekteve të komunave.
