Nga numërimi preliminar i votave në 38 komunat e Kosovës për zgjedhjet lokale të 12 tetorit, 21 komuna kanë zgjedhur në rundin e parë kryetarët përkatës ndërsa në 17 komuna tjera do të zhvillohet rundi i balotazhit i përcaktuar të mbahet më 9 nëntor 2025, raporton Anadolu.
Lëvizja Vetëvendosje (LVV) sipas rezultateve preliminare ka fituar pa balotazh në tre komuna: Podujevë, Kamenicë dhe Shtime.
Kryetari i LVV-së, njëherësh kryeministër në detyrë i Kosovës, Albin Kurti, në një konferencë për media sot tha se me votat nga diaspora mund që edhe Gjilani të fitohet pa balotazh nga partia që udhëheqë ai.
“Jemi në balotazh në 12 nga 17 komuna sa kanë shkuar gjithsej në balotazh nëse e përfshijmë edhe Gjilanin aty”, theksoi Kurti i cili i konsideroi si “shumë të mira” rezultatet e Lëvizjes Vetëvendosje.
Ai tha se LVV jo vetëm që e ka ruajtur rritjen nga cikli në ciklin tjetër zgjedhor por është ngritur si forca kryesore politike në Kosovë edhe në nivelin lokal.
Partia Demokratike e Kosovës (PDK) sipas rezultateve preliminare ka fituar në tre komuna, Ferizaj, Skenderaj dhe Hani i Elezit, ndërsa në gjashtë komuna ajo është e para ose e dyta ku fituesit do të vendosen në balotazh.
Lidhja Demokratike e Kosovës (LDK) ka fituar pa balotazh në dy komuna, Istog dhe Lipjan ndërsa 9 kandidatë të kësaj partie do të garojnë përsëri në balotazh.
Aleanca për Ardhmërinë e Kosovës (AAK) dhe Nisma kanë fituar nga një komunë, sikurse Ramiz Lladrovci me listën e tij fitoi në Komunën e Drenasit, e po ashtu edhe Partia Demokratike Turke e Kosovës (KDTP) ka fituar komunën e Mamushës. Lista Serbe ka fituar nëntë komuna pa nevojë për të shkuar në balotazh, ndërsa në Komunën e Kllokotit ajo do të jetë garuese edhe në balotazh.
KQZ-ja tha se pret që brenda javës të përmbyllë numërimin e të gjitha votave, përkatësisht të asamblistëve, votave me kusht, të personave me nevoja të veçanta dhe atyre me postë.
