Kryebashkiaku i Istanbulit, Ekrem Imamoglu, është arrestuar pas ndalimit të tij të mërkurën, së bashku me dhjetëra persona të tjerë, si pjesë e një hetimi për korrupsion në bashkinë metropolitane të Türkiyes.
Prokuroria e Përgjithshme e Istanbulit deklaroi zyrtarisht: “Në kuadër të hetimeve të kryera nga Prokuroria jonë e Përgjithshme, Gjykata e Magjistraturës në detyrë ka vendosur arrestimin e të dyshuarit, Ekrem Imamoglu, me akuzat për krijimin dhe drejtimin e një organizate kriminale, marrjen e ryshfetit, zhvatje, regjistrim të paligjshëm të të dhënave personale dhe ndërhyrje në tender, në kuadër të një hetimi financiar.”
Prokuroria e Istanbulit ka nisur hetime kundër Imamoglut dhe 99 të dyshuarve të tjerë për akuza që përfshijnë drejtimin e një organizate kriminale, anëtarësimin në një organizatë kriminale, shpërdorim të detyrës, ryshfet, mashtrim të rënduar, marrje të paligjshme të të dhënave personale dhe manipulim të tenderëve publikë.
Pasi u përpunuan në komisariat, disa të dyshuar u transferuan në Gjykatën e Istanbulit në Çağlayan, ku u zhvilluan procedurat para Gjykatës Penale të Paqes në detyrë.
Gjykata vendosi për arrestimin e Imamoglut.
Imamoglu dha dëshmi në Drejtorinë e Policisë së Istanbulit të premten dhe të shtunën lidhur me akuzat për korrupsion. Më pas ai u transferua në Prokurorinë e Përgjithshme të Istanbulit për t’u marrë në pyetje përfundimtare, para se të dërgohej në gjykatë së bashku me 99 të dyshuar të tjerë.
Në kuadër të hetimeve u arrestuan edhe Murat Ongun, ndihmës i Imamoglut dhe kryetar i Medya Inc., një kompani e bashkisë, si dhe Tuncay Yilmaz, Drejtor i Përgjithshëm i kompanisë ‘Imamoglu Insaat’.
Imamoglu dhe të gjithë të dyshuarit e tjerë i kanë mohuar akuzat.
Përfshirja në organizatën terroriste PKK/KCK
Imamoglu akuzohet gjithashtu për përfshirje në një iniciativë të “konsensusit të qytetit”, që dyshohet se ka synuar ta zgjerojë ndikimin e organizatës terroriste PKK/KCK në zonat urbane.
“Sa i përket të dyshuarit Ekrem Imamoglu, megjithëse ka dyshime të forta se ai ka ndihmuar një organizatë terroriste të armatosur, është vlerësuar e panevojshme të merren masa të tjera në këtë fazë, pasi tashmë është urdhëruar të arrestohet për krime financiare”, tha gjykata./TRT
