Legjislatura e re e Kuvendit të Shqipërisë, ka nisur me tensione. Opozita ka vijuar të pengojë punimet, duke i hedhur sende kryeministrit Edi Rama.
Në këtë mënyrë siç edhe u paralajmërua nga Niko Peleshi, është kaluar direkt në votim.
Gjatë tensioneve në seancë, deputeti Gazment Bardhi hodhi letra drejt kryeministrit Rama dhe kryetarit të seancës, Peleshi, si shenjë proteste.
Ndërkohë, efektivë të Gardës së Republikës u pozicionuan në mbrojtje të drejtuesve të seancës, raportojnë mediat nga Shqipëria.
Në të njëjtën kohë, deputetët e opozitës u ngritën dhe qëndruan para foltores së Kuvendit, duke protestuar ndaj mënyrës së zhvillimit të seancës dhe vendimit për të mos lejuar diskutimet mbi programin e qeverisë së re.
Në mesin e tensioneve seanca e cila zgjati më pak se 30 minuta u votua edhe programi qeverisës me 82 vota pro.
Fillimisht seanca nisi me fjalën e kryeministrit Edi Rama, i cili prezantoi në Kuvend programin qeverisës.
“Kjo përkon me kohëzgjatjen e planit për të ulur Shqipërinë në tryezën e BE. Programi ynë është zgjidhja e provimit, por suksesi do të varet nga aftësitë e secilës dhe këmbëngulja jonë për të kaluar nga letra e programit në realitetin e Shqipërisë dhe Shqiptarëve. Shqipëria 2030 në BE është kryefjala e këtij mandati. Shqipëria europiane është busulla orientuese e çdo faqe të programit tone”, ka thënë Rama. /Telegrafi/
