Ministri i Jashtëm i Rusisë, Sergey Lavrov tha se nuk refuzojnë negociatat me Ukrainën, por që mundësia e arritjes së marrëveshjes me Moskën do të vështirësohet për sa kohë Kievi e vonon këtë, transmeton Anadolu Agency (AA).
Në një deklaratë në programin “Moska.Kremlini.Putini” në kanalin shtetëror “Rossiya-1”, Lavrov theksoi se presidenti rus Vladimir Putin ka shpjeguar qëndrimin e vendit të tij në Ukrainë gjatë një diskutimi të zhvilluar me liderët e partive dhe zyrtarët e Dumës Shtetërore, Dhomës së ulët të Parlamentit.
“Rusia nuk refuzon negociatat me Ukrainën. Putin ka vënë në dukje se ata që vonojnë negociatat duhet ta kuptojnë se sa më shumë ta vonojnë këtë proces, aq më e vështirë do të jetë për ata që të negociojnë me ne”, tha Lavrov.
Ai rikujtoi se qeveria e Kievit ka thënë se “negociatat mund të zhvillohen vetëm pas fitores së Ukrainës dhe kur Rusia të largohet nga territoret e Ukrainës”.
“Ata do të jenë të gatshëm të bisedojnë duke na imponuar në kushtet e tyre. Në këtë çështje ata mbështeten në mënyrë aktive dhe madje llastohen nga Londra, Washingtoni, Brukseli. Nëse kjo është zgjedhja e tyre, ne e dimë se si t‘i arrijmë objektivat e vendosura nga presidenti rus Putin në kuadër të operacionit special ushtarak”, tha Lavrov.
Duke bërë të ditur se ata ende nuk kanë mundur të marrin informacion nga Perëndimi për ngjarjet në Bucha, dy ditë pas arritjes së marrëveshjes në Istanbul mes delegacioneve ukrainase dhe ruse, Lavrov shpjegoi se ata që ia hodhën këtu të gjithë fajin Rusisë, nuk kanë dhënë emrat lidhur me pretendimet në ushtrinë ruse, ashtu sikurse në rastin Skripal.
