Pas dështimit të seancës për konstituimin e Kuvendit të Kosovës, kryetari i Nismës Socialdemokrate, Fatmir Limaj, ka komentuar situatën duke theksuar se zhvillimet e fundit, përfshirë kërkesën e presidentes Vjosa Osmani drejtuar Gjykatës Kushtetuese, mund të ndihmojnë në tejkalimin e krizës.
“Besoj që ka zhvillime të reja nga dje. Çështja e konstituimit të Kuvendit u zgjat deri në atë shkallë sa që u detyrua të përfshihet presidentja për të ndihmuar në zgjidhjen e krizës,” tha Limaj.
Ai shtoi se veprimi i presidentes për t’u drejtuar gjykatës është i rëndësishëm për qartësimin e çështjes, jo vetëm për momentin, por edhe për të ardhmen.
“Ne jemi dëshmitarë që rregullorja dhe infrastruktura ligjore kanë lënë zbrazëtira, të cilat kanë krijuar këto situata. Veprimi i presidentes do të ndihmojë të qartësojë këtë çështje, si në tanishmen, ashtu edhe për të ardhmen,” tha Limaj.
Kreu i Nismës theksoi se në interes të partive politike është të pritet vendimi i Gjykatës Kushtetuese, duke marrë në konsideratë edhe mundësinë e vendosjes së masës së përkohshme.
“Nëse ka masa, partitë politike gjatë kësaj kohe duhet të gjejnë një zgjidhje dhe të arrijnë një shumicë parlamentare,” theksoi Limaj.
Ai përfundoi duke theksuar qëndrimin e Nismës për një zgjidhje të plotë dhe jo parciale.
“Nisma nuk beson në zgjidhje gjysmake që mund të shkaktojnë zgjedhje të parakohshme. Ne duam një shumicë qeverisëse që do të konstituojë edhe Kuvendin, edhe krijon qeverinë,” përfundoi Limaj.
