Organizata e Kombeve të Bashkuara ka deklaruar se nuk ka asnjë informacion nëse Fondacioni Humanitar për Gazën (GHF), i mbështetur nga SHBA, ka shpërndarë ndonjë ndihmë në territorin e rrethuar.
Zëdhënësi i Zyrës Humanitare të OKB-së në Gjenevë, Jens Laerke, i quajti aktivitetet e raportuara të GHF-së “një shpërqendrim”.
“Ajo që nevojitet me të vërtetë,” tha ai, “është hapja e të gjitha kalimeve drejt Gazës, një mjedis i sigurt brenda saj dhe përshpejtimi i miratimeve për ndihmat emergjente që ndodhen jashtë kufirit dhe duhet të hyjnë.”
Ai shtoi se Izraeli duhet të ndalojë kufizimet ndaj llojit të ndihmave që lejon të hyjnë, pasi ato po përzgjidhen dhe shpesh nuk përputhen me nevojat reale.
Ndërkohë, zëdhënësja e UNRWA-s, Juliette Touma, tha përmes videolidhjes se agjencitë e OKB-së nuk kanë “asnjë informacion” për ndonjë ndihmë të dërguar nga GHF në Gaza.
“Ajo që dimë është se kemi nevojë për 500-600 kamionë ndihma në ditë që të hyjnë në territor,” tha Touma. “Jo vetëm ushqim, por edhe ilaçe, vaksina për fëmijë, karburant, ujë dhe produkte të tjera bazë për mbijetesë.” /mesazhi
