Moskë
Presidenti i Rusisë, Vladimir Putin vuri në dukje se situata në tregjet e energjisë nuk mund të zgjidhjet me ndërhyrje dhe tha se “Rusia është e gatshme për dërgimin e gazit në Evropë”, transmeton Anadolu Agency (AA).
Duke folur për tregjet globale të energjisë të mbajtur në kuadër të Javës Ruse të Energjisë në Moskë, Putin tha se ndaj tubacioneve të “Rrjedhës Veriore 1” dhe “Rrjedhës Veriore 2” janë kryer “sulme terroriste”.
“Këto sulme treguan se tashmë të gjitha infrastrukturat e energjisë, transportit dhe komunikimit me rëndësi kritike ndodhen nën kërcënim. Kush qëndron pas sabotimeve të ‘Rrjedhës Veriore’? Sigurisht që ka nga ata që duan të shkëpusin marrëdhëniet mes Rusisë dhe Bashkimit Evropian dhe të kapin tregun”, tha Putin duke shtuar se:
“Rusia, përfshirë edhe dimrin është e gatshme për dërgimin e gazit në Evropë. Topi është në fushën e tyre. Mund të realizojmë dërgesa në periudhën e kësaj vjeshte dhe dimrit”, theksoi Putin duke bërë të ditur se mund ta realizojnë dërgimin e gazit natyror në Evropë përmes linjës që ka mbetur e qëndrueshme (funksionale) në “Rrjedhën Veriore 2”.
– “Në Türkiye mund të krijohet një qendër gazi për Evropën”
Presidenti rus tha se ndërhyrjet “artificiale” kundrejt tregjeve të energjisë nuk do të funksionojnë. “Asnjë ndërhyrje kundrejt tregjeve të naftës, asnjë përdorim i rezervave nuk mund ta zgjidhë problemin e energjisë. Nuk ka burim aktual të lirë në sasinë e nevojshme”, tha ai.
Sipas tij, kapacitetet që nuk mund të përdoren në “Rrjedhën Veriore 1” dhe “Rrjedhën Veriore 2” mund të vihen në përdorim përmes tubacionit të “Rrjedhës Turke” (TürkAkım).
“Vëllimet e humbura në ‘Rrjedhën Veriore’ në Detin Baltik mund t’i orientojmë në Detin e Zi. Në këtë mënyrë në Türkiye mund të krijohet një qendër gazi për Evropën, duke siguruar rrugën kryesore për burimet tona të karburantit dhe gazit natyror për në Evropë nëpërmjet Türkiye-s”, theksoi Putin.
