Presidenti amerikan Donald Trump ka vendosur sanksione ndaj dy kompanive më të mëdha të naftës në Rusi.
Rosneft dhe Lukoil, si dhe dhjetëra degë të tyre, u goditën nga kufizimet e reja.
Sekretari i Thesarit, Scott Bessent, tha se kjo ndodhi për shkak të “mungesës së angazhimit serioz të Rusisë ndaj një procesi paqeje për t’i dhënë fund luftës në Ukrainë”.
Ai shtoi: “Duke pasur parasysh refuzimin e presidentit Putin për t’i dhënë fund kësaj lufte të pakuptimtë, thesari po vendos sanksione ndaj dy kompanive më të mëdha të naftës në Rusi që financojnë makinën e luftës së Kremlinit.”
“Ne i inkurajojmë aleatët tanë të bashkohen me ne dhe t’u përmbahen këtyre sanksioneve.”
Ky veprim shënon një ndryshim të dukshëm në Uashington, i cili është luhatur midis presionit ndaj Moskës dhe ndjekjes së një qasje më pajtuese.
SHBA-të prej kohësh kanë ngritur shqetësime me vendet që blejnë naftën e Rusisë, duke i vendosur më parë sanksione Indisë për këtë veprim dhe duke i kritikuar vazhdimisht edhe vendet evropiane.
