Një nga zinxhirët më të mëdhenj të supermarketeve në Itali, Coop Alleanza 3.0, ka njoftuar se ka ndaluar shitjen e produkteve izraelite në shenjë solidariteti me popullin palestinez në Gaza, mes gjenocidit të vazhdueshëm dhe bllokadës së ndihmave nga Izraeli.
Vendimi, i shpallur këtë javë, përfaqëson rastin e parë të një rrjeti të madh ushqimor italian që ndërmerr një veprim të tillë. Në deklaratë thuhet se nga raftet do të hiqen produktet si kikirikë izraelitë, salca tahini dhe pajisjet për ujë të gazuar SodaStream.
Gjithashtu, disa supermarkete kanë nisur të shesin pijet Gaza Cola, një alternativë pro-palestineze ndaj markave të njohura ndërkombëtare.
Coop Alleanza 3.0 është bashkimi më i madh i rrjeteve Coop Italia, me rreth 350 dyqane që shtrihen nga veriu i Italisë (Friuli-Venezia Giulia) deri në jug (Puglia). Në deklaratë, kooperativa thekson: “Nuk mund të qëndrojmë indiferentë ndaj dhunës së vazhdueshme në Rripin e Gazës dhe bashkohemi në thirrjen për ndërprerjen e menjëhershme të operacioneve ushtarake.”
Degë të tjera të Coop në Firence, Toskanë, Lazio dhe Umbria gjithashtu kanë ndaluar shitjen e produkteve izraelite. Megjithatë, përfaqësuesit thanë se ky nuk është një bojkot formal, por një veprim i përkohshëm i diktuar nga situata aktuale humanitare.
Sulmi 20-mujor i Izraelit në Gaza ka shkaktuar reagime dhe protesta në mbarë botën nga konsumatorë dhe shitës me pakicë.
Të martën, edhe zinxhiri britanik Co-op Group (entitet i ndarë nga Coop Italia) njoftoi se do të ndalojë furnizimin me produkte nga Izraeli dhe 16 vende të tjera ku, sipas tyre, ka shkelje të të drejtave të njeriut dhe të ligjit ndërkombëtar. /mesazhi
