Ish-ndihmëssekretari amerikan, James Rubin, po vazhdon dhe sot dëshminë e tij në Dhomat e Specializuara në Hagë.
Prokurori pyeti Rubin nëse ka njohur për pretendimet për ndalimin e 13 politikanëve në Qerez të Shqipërisë nga UÇK, e ku më pas disa politikanë ishin maltretuar.
Rubin u përgjigj “nuk më kujtohet një pretendim i tillë. Nuk më kujtohet as ngjarja, as incidenti dhe as prania e Hashim Thaçit”.
Ai po ashtu deklaroi se ishte kthyer në Kosovë për marrëveshje në Luginën e Preshevës për ndalimin e dhunës atje, dhe se më pas ishte informuar se marrëveshje ka qenë e suksesshme.
Gjithashtu, ai deklaroi se pas vitit 1999 ka përcjellur zhvillimet që kanë ndodhur në Kosovë.
Në nisje të seancës gjyqtari shpalosi katër urdhra verbale, në mesin e të cilëve ishte edhe një kërkesë e bërë nga mbrojtja e Veselit ku kishin kërkuar që 3 materiale të pranoheshin si prova.
