Pas kthimit brenda natës nga Hamasi të trupave të katër pengjeve të tjerë izraelitë në Gaza, u njoftua se Izraeli në përputhje me marrëveshjen e armëpushimit do të rihapë sot pikën kufitare Rafah midis Gazës dhe Egjiptit, e cila është porta e Gazës që hapet drejt botës, transmeton Anadolu.
Sipas televizionit shtetëror izraelit, KAN, qeveria izraelite ka vendosur të heqë sanksionet për të cilat kishte njoftuar se do t‘i zbatonte sot kundër Hamasit.
Raportohet se pika kufitare e Gazës me Egjiptin, Rafah, do të rihapet sot siç është planifikuar dhe se hyrjet e ndihmës humanitare do të vazhdojnë në përputhje me marrëveshjen.
U raportua se në vendimin e Izraelit ndikuan kthimi brenda natës nga Hamasi i katër trupave të tjerë të pengjeve të vdekur izraelitë në Rripin e Gazës, dhe kthimi i planifikuar i disa të tjerëve sot.
– Izraeli njoftoi se nuk do ta hapte të mërkurën pikën kufitare Rafah
Pavarësisht marrëveshjes së armëpushimit me Hamasin, Izraeli njoftoi se nuk do ta hapte të mërkurën pikën kufitare Rafah, e cila siguron qasje në Rripin e Gazës nëpërmjet Egjiptit.
Si justifikim për mos-hapjen e pikës kufitare Rafah Izraeli përmendi vonesën në kthimin e trupave të të gjithë pengjeve të vdekur izraelitë të mbajtur nga Hamasi.
Hamasi ia dorëzoi Kryqit të Kuq trupat e katër pengjeve të tjerë izraelitë në Rripin e Gazës gjatë natës, si pjesë e një shkëmbimi të burgosurish. Kështu, sipas kushteve të armëpushimit dhe marrëveshjes së shkëmbimit të pengjeve, Hamasi ktheu trupat e tetë prej 28 të pengjeve të vdekur në Gaza.
Në marrëveshjen e armëpushimit mes palëve ishte pranuar se për shkak të sulmeve gjenocidale dyvjeçare të Izraelit ndaj Gazës dhe pushtimit të vazhdueshëm të pjesëve të Gazës nga ushtria izraelite, do të ishte e vështirë që Hamasi të përcaktonte vendet e të gjithë trupave.
Për këtë arsye, u vendos të formohej një komitet me përfaqësues nga Turqia, Katari, Egjipti dhe Shtetet e Bashkuara të Amerikës për të siguruar zbulimin e trupave të pengjeve të vdekur izraelitë në Gaza.
