Më shumë se 140 gra shtatzëna kanë mbërritur në kampet e Al-Dabbah pas rënies së qytetit El-Fasher muajin e kaluar, sipas Tasneem Al-Amin nga Rrjeti i Mjekëve të Sudanit, një grup profesionistësh shëndetësorë që ndjek luftën.
Njëra prej tyre është Nadra Mohamed Ahmed, e cila, pak javë para se qyteti i saj të binte në duart e forcave RSF, bëri gati 40 km rrugë në këmbë nëpër zona të pasigurta, së bashku me dy fëmijët e saj, derisa gjeti transport drejt një strehimi në veri të vendit.
“Kur arrita këtu, kisha humbur shumë gjak,” tha ajo nga tendë e kampit të mbipopulluar në Al-Dabbah. Ajo u shtrua në terapi intensive dhe iu nënshtrua transfuzionit të gjakut.
Ahmed u largua nga El-Fasher në Darfurin Perëndimor, dy muaj para se qyteti të pushtohej nga forcat paramilitare të Rapid Support Forces (RSF), të cilat prej më shumë se dy vitesh janë në luftë me ushtrinë sudaneze.
Sipas Al-Amin, shumë nga gratë shtatzëna që mbërrijnë në kamp vuajnë komplikacione të rënda, sidomos hemorragji, që shpesh çon edhe në abort spontan.
Duke mbajtur në shpinë vajzën katërvjeçare dhe duke ecur dorë për dore me djalin gjashtëvjeçar, Ahmed bëri një pjesë të udhëtimit 14-ditor në këmbë, ndërsa bashkëshorti i saj kishte humbur pa gjurmë pak para arratisjes së saj. /mesazhi
