Presidenti francez Emmanuel Macron bëri thirrje të enjten për mbrojtje më të fortë dhe më të integruar evropiane, dhe tha se kontinenti nuk duhet të bëhet një vasal i Shteteve të Bashkuara, pasi ai përshkroi vizionin e tij për një Bashkim Evropian më të sigurt në skenën globale, shkruan Reuters.
Me vetëm tre vjet të mbetur nga mandati i tij i dytë dhe i fundit në detyrë, dhe pasi humbi shumicën e tij parlamentare në 2022, Macron, dëshiron t’u tregojë kritikëve të tij se ruan energjinë dhe mendimin e freskët që e ndihmuan ta shtynte atë në presidencë në vitin 2017 dhe se nuk është bërë prijës i çalë, transmeton Telegrafi.
“Ekziston rreziku që Evropa jonë të vdesë. Ne nuk jemi të pajisur për t’u përballur me rreziqet”, tha Macron në fjalimin e tij në Universitetin e Sorbonës në Paris, duke paralajmëruar se presionet ushtarake, ekonomike dhe të tjera mund të dobësojnë dhe copëtojnë BE-në prej 27-vendesh.
Macron tha se Rusia nuk duhet të lejohet të fitojë në Ukrainë dhe bëri thirrje për një rritje të kapacitetit të sigurisë kibernetike të Evropës, lidhje më të ngushta të mbrojtjes me Britaninë pas Brexit dhe krijimin e një akademie evropiane për të trajnuar personelin ushtarak të rangut të lartë.
Megjithatë, shumë zyrtarë të BE-së besojnë se aktualisht nuk ka asnjë alternativë të besueshme ndaj ombrellës ushtarake të SHBA-së dhe disa dyshojnë se Macron po shtyn interesat industriale franceze. /Telegrafi/
