Një incident i pazakontë ka ndodhur të enjten në mëngjes në Klinikën e Urologjisë në Qendrën Klinike Universitare të Kosovës (QKUK), ku dy urologë janë përleshur fizikisht brenda hapësirave të spitalit.
Ngjarja ka ndodhur rreth orës 08:00 dhe shkak i përplasjes mes dy mjekëve – me inicialet S.H dhe S.M – ka qenë mosmarrëveshja lidhur me programin operativ të pacientëve.
Pas një debati verbal, situata eskaloi deri në sulm fizik, ku dyshohet se urologu S.H ka sulmuar kolegun e tij S.M.
Drejtori i Klinikës së Urologjisë, Bujar Frangu, e ka konfirmuar ngjarjen duke deklaruar shkurtimisht:
“Jemi në grumbullimin e informacioneve.”
Ndërkohë, Policia e Kosovës ka reaguar menjëherë dhe ka konfirmuar praninë në vendin e ngjarjes.
Zëdhënësi i policisë ka deklaruar:
“Sot në Stacionin Policor Jugu në Prishtinë është iniciuar një rast ‘sulm ndaj personit zyrtar’, që ka ndodhur rreth orës 08:00 në QKUK. Lidhur me rastin janë intervistuar të dy personat e përfshirë. Rasti është në trajtim në koordinim me prokurorinë kompetente.”
Ky incident ka ngritur shqetësime të mëdha për etikën profesionale dhe sigurinë brenda institucioneve shëndetësore, veçanërisht në një nga klinikat më të rëndësishme të vendit.
