Kryetari i Partisë për Liri, Drejtësi dhe Mbijetesë, Nenad Rashiq, vlerëson se Kuvendi i Kosovës nuk është konstituuar, pavarësisht që kryeparlamentari Dimal Basha e shpalli të mbyllur seancën. Rashiq, i cili është edhe deputet në Kuvend nga komuniteti serb, thekson nevojën e zgjedhjes së nënkryetarit nga komuniteti serb për të përmbyllur këtë proces, ndonëse edhe vetë ishte kandidat për nënkryetar, por nuk arriti t’i marrë 61 vota.
“Unë kam komunikim të mirë me kryeministrin dhe ministrat e tjerë, por megjithatë, prapë të gjithë ne politikanët duhet të jemi objektivë dhe të jemi të përgjegjshëm për punën që e bëjmë dhe ta flasim të vërtetën. Në këtë rast, për mendimin tim, të gjithë politikanët kanë obligim që ta thonë të vërtetën nga këndi që ne shikojmë gjërat. Unë në këtë rast po më duhet të jem më i përgjegjshëm mbi të gjithë ata përfaqësues të Listës Serbe që nuk dinë as të drejtohen në mënyrën e duhur. Unë, me çdo respekt që kam ndaj përfaqësuesve të LVV-së, më duhet të tregoj se në këtë rast dhe besoj se do të dëshmohet se nuk është konstituar Kuvendi, siç është paraparë me Kushtetutë”, deklaroi Rashiq për KosovaPress.
Krahas kësaj, Rashiq pret që Gjykata Kushtetuese, gjatë kësaj jave, të vendosë masë të përkohshme për seancën konstituive në mënyrë që të mos rrjedhë afati për formimin e qeverisë.
Teksa foli sërish për kandidaturën e tij për nënkryetar të Kuvendit, Rashiq thotë se nëse Kushtetuesja aprovon kërkesën e Listës Serbe dhe vendoset që votimi për nënkryetarët nga komunitetet jo shumicë të bëhet në pako, atëherë ai pajtohet me një gjë të tillë.
Rashiq madje shprehet i bindur se as presidentja Vjosa Osmani nuk do ta mandatojë kandidatin e LVV-së për kryeministër, derisa të ketë një vendimmarrje të Kushtetueses, pas ankesës së Listës Serbe.
Presidentja Vjosa Osmani ka pasur një takim me kryetarin e Kuvendit, Dimal Basha, në fillim të kësaj jave. Pas takimit, përmes një kumtese për media nga zyra e të parës së shtetit, është thënë se ajo, bashkë me ekipin e saj ligjor, po analizojnë situatën në Kuvend që më pas të kenë një qëndrim.
