Bashkimi Evropian është gati të propozojë një paketë sanksionesh të reja përpara dyvjetorit të fillimit të agresionit rus mbi Ukrainë.
Paketa e cila do të jetë e 13-ta me radhë që nga pushtimi, do të përfshijë propozime për dhjetëra individë dhe subjekte, si dhe një numër të vogël masash të fokusuara në aftësinë e Moskës për të përfituar nga teknologjia e avancuar perëndimore e armëve.
Masat po koordinohen me aleatët e G7, ku secili vend pritet të lëshojë paketën e vet të sanksioneve përpara përvjetorit të pushtimit.
Bëhet e ditur se, ambasadorët e BE-së janë informuar për detajet e sanksioneve gjatë fundjavës.
Gjithashtu, BE po shpreson të finalizojë miratimin e një plani për t’i ofruar Kievit ndihmë ekonomike, pasi liderët e bllokut ranë dakord për një mbështetje 50 miliardë euroshe.
Ndryshe, një grup i vogël i shteteve anëtare e kanë shtyrë BE-në të zgjerojë sanksionet në më shumë sektorë dhe industri, por këto masa janë refuzuar prej kohësh nga disa kryeqytete.
Pjesa më e madhe e fokusit të BE-së ka qenë në zbatimin e sanksioneve ekzistuese, ndërsa Rusia vazhdon të gjejë mënyra për të importuar teknologjitë kryesore të armëve.
Blloku evropian po përparon edhe me planet për të aplikuar një taksë të papritur ndaj fitimeve të ngrira të Bankës Qendrore Ruse. /Telegrafi/
