“Ne duhet të përqendrohemi në një zgjidhje politike të problemit një herë e përgjithmonë”, tha shefi i politikës së jashtme i BE-së.
Pavarësisht disa qasjeve të ndryshme midis vendeve anëtare, sot gjithnjë e më shumë vende të BE-së mbështesin një armëpushim në Rripin e Gazës, tha shefi i politikës së jashtme të BE-së, Josep Borrell, raporton Anadolu.
Duke folur për shtypin përpara samitit të Këshillit Evropian në Bruksel, Borrell tha se udhëheqësit do të diskutojnë luftën në Ukrainë dhe çështjet e zgjerimit.
“Do të diskutojmë gjithashtu situatën në Gaza”, tha ai, duke shtuar se do të duhet të marrin parasysh votimin e javës së kaluar në Asamblenë e Përgjithshme të OKB-së që bën thirrje për një armëpushim në enklavën e rrethuar.
Evropianët duhet të fillojnë të mendojnë se si të merren me problemin duke përdorur një qasje politike, tha ai.
“Vendet arabe kanë thënë tashmë se nuk do të marrin pjesë në rindërtimin e Gazës nëse nuk ka një angazhim të fortë nga komuniteti ndërkombëtar për të ndërtuar një zgjidhje me dy shtete. Dhe ne duhet të përqendrohemi në këtë”, tha Borrell.
Ai tha se ka qasje të ndryshme midis shteteve të BE-së, megjithatë, siç tregoi votimi i javës së kaluar në OKB, sot ka më shumë shtete anëtare që mbështesin një armëpushim sesa më parë.
“Gjithnjë e më shumë njerëz” po bëjnë presion për një armëpushim, tha ai.
“Ne duhet të përqendrohemi në një zgjidhje politike të problemit një herë e përgjithmonë. Dhe kjo është diçka që unë jam i sigurt se udhëheqësit do ta diskutojnë”, shtoi ai.
Izraeli ka bombarduar Rripin e Gazës nga ajri dhe toka, ka vendosur një rrethim dhe ka ndërmarrë një ofensivë tokësore në hakmarrje të sulmit ndërkufitar nga Hamasi më 7 tetor.
Të paktën 18.608 palestinezë janë vrarë dhe më shumë se 50.100 të tjerë janë plagosur në sulmet izraelite që atëherë.\A.A\
