Chelsea ka filluar bisedimet me Ajaxin për të shprehur interesin për nënshkrimin e Mohammed Kudus, raporton David Ornstein i The Athletic.
Dialogu mes klubeve është në fazën fillestare dhe ende nuk është paraqitur asnjë ofertë zyrtare.
Blutë kanë qenë tashmë në kontakt me përfaqësuesit e lojtarit dhe marrëveshja për kushtet personale raportohet se është arritur. Megjithatë, Kudus nuk është lojtari i vetëm në shqyrtim për Chelsean.
Reprezentuesi i Ganës, i cili mund të luajë si në mesfushë ashtu edhe në sulm, dëshiron të largohet nga Ajaxi.
Ai refuzoi një rinovim të kontratës në prill, me marrëveshjen e tij aktuale që skadon në dy vjet.
Sezonin e kaluar, 22-vjeçari shënoi 18 gola dhe dha shtatë asistime në 42 ndeshje për Ajaxin. Ai gjithashtu shënoi një dygolësh për Ganën kundër Koresë së Jugut në fazën e grupeve të Kupës së Botës. /Telegrafi/
