Presidentja e Kosovës, Vjosa Osmani, bashkë me Mary Elieen Deviit, në emër të USAID-it, kanë nënshkruar marrëveshjen e grantit për objektivat zhvillimore në vlerë prej 34.5 milionë dollarësh.
Presidentja e Kosovës, Vjosa Osmani, ka thënë se marrëveshja e grantit që ka nënshkruar me USAID-in është një rikonfirmim drejt vizionit të përbashkët me ShBA-në për një të ardhme më të mirë e më të qëndrueshme.
Në një konferencë për media me ambasadorin amerikan në Kosovë, Jeff Hovenier, e para e vendit ka theksuar se ShBA-ja ka qenë dhe mbetet një partnere e përkushtuar dhe e palëkundur për popullin e Kosovës.
Osmani ka theksuar se çdo nismë që ka për synim përmirësimin e jetës së qytetarëve ka gjurmët e ShBA-së.
Tutje, ajo ka thënë se kjo marrëveshje nuk është vetëm një hap përpara në përpjekjet e përbashkëta të vazhdueshme për zhvillim, por edhe pasqyrim i fuqisë së bashkëpunimit të dy shteteve.
