Kryenegociatorët e Kosovës dhe Serbisë, kanë zhvilluar të enjten takime të ndara në Bruksel për të diskutuar rreth zbatimit të marrëveshjeve paraprake, të arritura mes dy vendeve.
I dërguari i Bashkimit Evropian për dialogun mes dy vendeve, Mirosllav Lajçak, është takuar fillimisht me kryenegociatorin e Serbisë, Petar Petkoviq, njëherësh shef i Zyrës për Kosovën në Qeverinë e Serbisë e më pas me krynegociatorin e Kosovës, Besnik Bislimi – zëvendëskryeministër i vendit.
Takim trepalësh nuk ka pasur.
BE-ja ka bërë të ditur se paralelisht janë zhvilluar edhe takime ekspertësh për të pagjeturit dhe për çështje të energjisë.
Bislimi ka thënë të mërkurën se takimi i 16 nëntorit është vazhdimësi e takimit të zhvilluar më 26 tetor me liderët e Gjermanisë, Francës, Italisë dhe bllokut evropian.
Petkoviqi ka thënë ditë më parë se në Bruksel do të niset me një “ekip ekspertësh”. /REL
