Më 21 dhe 22 dhjetor 2023, shefi i Forcave të Armatosura të Zvicrës, Komandanti i Korpusit Thomas Sussli, do të vizitojë trupat e dislokuara në Kosovë dhe Bosnjë e Hercegovinë në kuadër të ndërtimit të paqes ushtarake. Me këtë rast ai takohet edhe me komandantin e Forcës së Kosovës (KFOR).
Gjatë vizitës së tij, siç njofton qeveria zvicerane, Shefi i Forcave të Armatosura synon të zhvillojë bisedime me Forcat e Armatosura të Zvicrës të dislokuara atje dhe të marrë një pasqyrë të përditësuar të shërbimeve të ndryshme të ofruara për KFOR-in.
“Me këtë rast është planifikuar edhe një takim dypalësh me komandantin e KFOR-it, gjeneralmajor Ozkan Ulutash të Forcave të Armatosura të Turqisë. Në vitin 2023, misioni i Ushtrisë Zvicerane në KFOR u zgjat deri në fund të vitit 2026”, thuhet në njoftim.
Tutje, thuhet se kreu i ushtrisë do të udhëtojë në Bosnje dhe Hercegovinë për të marrë një ide mbi situatën në rajon. Atje ai do të takohet me pjesëtarët e Forcave të Armatosura të Zvicrës që po marrin pjesë në misionin Althea të Forcave të Bashkimit Evropian (EUFOR).
Shefi i Forcave të Armatosura do të shoqërohet nga Këshilltaret e Qeverisë Laura Dittli (ZG) dhe Kathrin Schweizer (BL) si dhe përfaqësues të Forcave të Armatosura.
“Ndërtimi i paqes ushtarake në shkallë ndërkombëtare është një nga tre misionet e Forcave të Armatosura të Zvicrës. Aktualisht, rreth 300 burra dhe gra të gradave të ndryshme në 19 vende po kontribuojnë për paqen”, u tha në fund të njoftimit.
