Sot (e premte) do të fillojë edhe zyrtarisht turneu i pingpongut “Prishtina Open Table Tennis International Tournament 2024” që do të mbahet për tri ditë radhazi.
Nga sot, 7 qershor, deri të dielën më 9 qershor, në Pallatin e Rinisë dhe Sportit (salla e basketbollit), do të mbahet turneu internacional i pingpongut “Prishtina Open 2024”.
Kjo ngjarje ndërkombëtare është edicioni i dytë i “Prishtina Open”, turne ky i cili do të ofrojë një mundësi të shkëlqyer për të promovuar Qytetin Evropian të Sportit, Prishtina 2024.
Në konferencën e sotme për shtyp, organizatori i turneut, Kryetari Klubit të Pingpongut Priping, Kastriot Orana ka treguar se në këtë turne pjesëmarrës do të jenë rreth 300 lojtarë nga mbi 20 shtete të botës.
“Të premten, më 7 qershor, me fillim nga ora 17.00, do të zhvillohen ndeshjet për veteranë, në kategoritë 40-49, 50-59, 60-64, 65-9 dhe 70+.
Të shtunën, me 8 qershor, do të zhvillohen ndeshjet për Grup-moshat U17 dhe U21, kurse me 9 qershor, të dielën, do të luajnë Grup-moshat U13 dhe seniorët.
Për fituesit e 3 vendeve të para, organizatorët do të ndajnë kupa, medalje dhe shpërblime në të holla, në vlerë prej 6300€, në total.
“Prej sot, me 7, 8 edhe 9 në Pallatin e Rinisë dhe Sportit në Prishtinë do të mbahet turneu ndërkombëtar i dytë i pingpongut “Prishtina Open”. Këtë vit, për dallim prej vitit të kaluar, do të ketë masivitet më të madh. Ka pjesëmarrje prej 20 shteteve dhe do të garojnë afër 300 lojtarë të kategorive të ndryshime”, ka thënë fillimisht Orana.
“Do të mbahen kategoritë e veteranëve, nesër do të luajnë juniorët e U17 dhe U21 dhe të dielën në mëngjes fillojnë U13, ndërsa pasdite do të luhen ndeshjet kryesore të seniorëve”.
“Këtë turne kemi lojtarë nga Rumania, Greqia, Ukraina, Irani, Egjipti dhe plotë vende të Evropës, pasi këtë vit jemi edhe qytet evropian i Sportit, kemi dhjetëra lojtarë nga shtetet evropiane si Franca, Gjermania, Anglia, Austria, Bullgaria dhe vendet e rajonit”, përfundoi organizatori i turneut.
