Raporti i fundit nga Klasifikimi i Fazës së Sigurisë Ushqimore (IPC) paralajmëron për uri masive në Gaza, vetëm pak ditë pasi autoritetet lokale njoftuan se të paktën 57 persona kanë vdekur nga uria për shkak të bllokadës së rreptë të ushqimit, ujit dhe ndihmës tjetër jetike nga Izraeli.
Në një deklaratë më 3 maj, Zyra e Medias e Qeverisë së Gazës tha se shumica e viktimave janë fëmijë, ndërsa mes tyre ka pasur edhe të moshuar dhe të sëmurë.
Deklarata dënoi “përdorimin e ushqimit si armë lufte nga okupatori izraelit” dhe bëri thirrje bashkësisë ndërkombëtare të ushtrojë presion për heqjen e bllokadës totale, e cila është në fuqi që nga 2 marsi.
Sipas Al Jazeera, njëra nga viktimat ishte një foshnjë, Janan Saleh al-Sakafi, e cila vdiq nga kequshqyerja dhe dehidratimi në Spitalin Rantisi, në perëndim të qytetit të Gazës. Sipas OKB-së, që nga fillimi i vitit mbi 9,000 fëmijë janë shtruar në spital për trajtim nga kequshqyerja akute. /mesazhi
